Дар Вилояти Мухтори Кӯҳистони Бадахшон машғулиятҳои огоҳсозии ҷомеа оид ба хатарҳои марбут ба пиряхҳо баргузор шуданд

Аз 9 то 15 июли соли 2026, Дафтари барномаҳои САҲА дар Душанбе якҷоя бо Кумитаи ҳолатҳои фавқулодда ва мудофиаи шаҳрвандӣ ва Агентии гидрометеорологияи назди Кумитаи ҳифзи муҳити зист як қатор машғулиятҳои огоҳсозии ҷомеаро оид ба омодагӣ ба ҳолатҳои фавқулодаи марбут ба пиряхҳо дар Вилояти Мухтори Кӯҳистони Бадахшон баргузор карданд.

Машғулиятҳо дар панҷ деҳаи ноҳияи Шуғнон – Ривак, Варшедс, Шазут, Шитам ва Вуж ва дар як деҳаи ноҳияи Дарвоз баргузор шуданд, ки дар ҳар як машғулият ҳадди ақал 20 нафар аъзои ҷомеа иштирок карданд. Иштирокчиён дар бораи нақши пиряхҳо ҳамчун манбаи муҳими об, таъсири тағйирёбии иқлим ба ақибнишинии пиряхҳо ва хатарҳое, ки аз кӯлҳои пиряхӣ ба вуҷуд меоянд, аз ҷумла арзёбии кӯли пиряхии болои деҳаи Зигардара бо истифода аз аксҳои моҳвораӣ маълумот гирифтанд. Презентатсияҳо бо такя ба натиҷаҳои тадқиқотҳои мавҷуда омода шуда буданд, дар ҳоле ки аксҳои моҳвораии Google Earth барои нишон додани пиряхҳои атрофи ҳар як деҳа ва кӯлҳои пиряхӣ, ки аз обшавии ях ба вуҷуд омадаанд, истифода шуданд.

Гарчанде ки сокинон дар бораи хатарҳои воқеъ дар наздикии ҷамоатҳои худ огоҳии хуб нишон доданд, муҳокимаҳо зарурати беҳтар дарк намудани хатарҳои дуртар, бахусус хатарҳое, ки аз кӯлҳои пиряхӣ ба вуҷуд меоянд, таъкид карданд. Иштирокчиён ва ташкилкунандагон идомаи чорабиниҳои огоҳсозии ҷомеа, мониторинги мунтазами пиряхҳо ва кӯлҳои пиряхӣ, инчунин тақвияти минбаъдаи системаҳои огоҳкунии барвақтро дар минтақа тавсия доданд.

Ташаббуси мазкур ба амалисозии ваколат ва афзалиятҳои Дафтари барномаҳои САҲА дар Душанбе тавассути пешбурди устувории экологӣ, коҳиши хатари офатҳо ва ҳамкории минтақавӣ мусоидат мекунад.