Ҳайати ҳафт нафар намояндагони доимии САҲА ба Ҷумҳурии Тоҷикистон сафари расмӣ мекунад

Аз 20 то 23 май, Дафтари барномаҳои САҲА дар Душанбе (Дафтари барномаҳо) барои ҳайати ҳафт нафар намояндагони доимӣ/сафирони САҲА дар Ҷумҳурии Тоҷикистон як қатор мулоқотҳои сатҳи баланд ва ташрифҳо ба маҳалҳоро ташкил кард. Ин боздид ба ҳамкории амнияти минтақавӣ, идоракунии марзҳо ва ташаббусҳои сатҳи ҷомеа, ки аз ҷониби Дафтари барномаҳои САҲА дар Ҷумҳурии Тоҷикистон дастгирӣ карда мешаванд, нигаронида шуда буд.

Ҳайати боздидкунанда аз Сафир Андреа Касконе (Италия), Сафир Вероник Пепин-Ҳалле (Канада), Сафир Сюзанна Шутс (Олмон), Сафир Фатен Бенабиле-Фот (Фаронса), Сафир Моник Де Руйтер (Ҳолландия), Сафир Нил Ҳолланд (Британияи Кабир) ва Кордори муваққати сафорат хонум Кейт Ребҳолз (Иёлоти Муттаҳида) иборат буд.

Дар доираи барнома, ҳайат аз Коллеҷи САҲА барои ҳайати роҳбарикунандаи сарҳадӣ боздид кард, то дар бораи нақши он дар такмили ихтисоси таъмини амнияти сарҳадӣ ва тақвияти муколама ва ҳамкории минтақавӣ байни мутахассисони идоракунии марзҳо аз тамоми минтақаи САҲА маълумоти бештар гирад.

Сафирон инчунин бо намояндагони Вазорати корҳои дохилӣ ва Вазорати мудофиаи Ҷумҳурии Тоҷикистон мулоқот карданд, то фаъолиятҳои ҷории САҲА-ро дар самти сиёсӣ-низомӣ, аз ҷумла кӯшишҳои марбут ба таҳдидҳои фаромиллӣ, ҳамкории амниятӣ ва мақомоти ҳифзи ҳуқуқ ва амнияти киберӣ, инчунин дастгирии кӯшишҳои таъсис ва тақвияти иқтидори Маркази таълимии минтақавии Вазорати мудофиа оид ба безарарсозии маводи тарканда муҳокима кунанд.

Ҷузъи ташриф ба маҳалҳо боздид аз як дидбонгоҳи сарҳадиро дар бар гирифт, ки дар он ҳайат дар бораи дастгирии САҲА тавассути лоиҳаи аз ҷониби Иттиҳоди Аврупо маблағгузоришуда, инчунин брифингҳо дар бораи вазъияти кунунии марзӣ ва мушкилоти мавҷудаи амалиётӣ маълумот гирифт.

Ҳайат инчунин ба як Маркази захиравии занон ташриф овард, ки дар он ҷо муҳокимаҳо ба барномаҳои дастгирии ҷомеа ва тақвияти занон нигаронида шуданд.

Барнома бо мулоқот дар Вазорати нақлиёти Ҷумҳурии Тоҷикистон бо Вазир Азим Иброҳим ва баъдан бо Муовини вазири корҳои хориҷии Ҷумҳурии Тоҷикистон Идибек Қаландар дар бораи ҳамкории САҲА ва Ҷумҳурии Тоҷикистон ва афзалиятҳои минтақавӣ анҷом ёфт.

Ин сафар имкон фароҳам овард, ки муколамаи мустақим байни сафирон, мақомоти миллӣ ва шарикони САҲА сурат гирад ва ҳамзамон дар бораи татбиқи ташаббусҳои аз ҷониби САҲА дар саросари Ҷумҳурии Тоҷикистон дастгиришуда маълумоти мустақим гирифта шавад.